Gígarnir í Grímsvötnum greinilegir
Gígarnir í Grímsvötnum sjást nú greinilega, eftir að vatnsborð í lóninu lækkaði í vor. Aukin jarðhitavirkni bræðir jökulstálið ofan í lónið.
Þessar myndir tók Ómar Ragnarsson síðasta fimmtudag - þarna sjást Grímsvötn úr austri. Jökullinn er allt í kring - og þegar byrjaður að þjarma að gosstöðinni - en ummerkin eftir hamfarirnar í fyrra eru enn greinileg.
„Við sjáum þarna gígrima, stóran - sem byrjaði að myndast eftir að fór að draga úr gosinu því þegar það var mest, þá var allur þessi ketill einn gígur - einn og hálfur kílómeter í þvermál,“ segir Magnús Tumi Guðmundsson, jarðeðlisfræðingur.
Enda kom gríðarlegt magn af ösku þarna upp í byrjun gossins í maí í fyrra og lagðist yfir sveitinar sunnan og vestan við en það dró fljótt úr krafti gossins.
„Og svo fóru að myndast þessir gígar inni í hinum gígnum, þegar fer að draga úr gosinu. Og þessi eyja sem sést þarna vestan til eru leifar af litlu gígunum sem voru virkir síðustu dagana."
Ertu með athugasemd vegna fréttarinnar? Sendu á frettir@ruv.is
